De mal en peor. Asi vai a situación ó respecto dos problemas derivados do pago da multa pola supertasa e do reparto da cota leiteira para esta campaña. Para colmo de males, o conselleiro de agricultura, Castor Gago, impedíu o mércores o paso do Sindicato Labrego á reunión do sector na Consellería.

Este sindicato presentou xa unha demanda xudicial pola acción do conselleiro, que consideran vulnera o seu dereito á acción sindical. A explicación do conselleiro, para a Cadena SER, vai aínda máis alá, Castor Gago considera que tanto o Sindicato Labrego coma o BNG, están instigando ós gandeiros a saltarse a sua cota de leite. Así as cousas, a incertidume ábrese entre os gandeiros.

O único acordo saído da reunión do mércores, foi o de constituir unha comisión que vixile mensualmente que se están a cumprir as cifras da cota, para impedir que esta diferencia se dispare, como sucedeu este ano.

Unha medida esta que si ven podería axudar a solucionar esta situación na vindeira campaña, non resolve o problema derivado da multa deste ano, que alcanzaría os 2.200 millóns de pesetas. Tamén quixemos coñecer máis datos que lles poidan servir para darse conta da repercusión destas cuestións na bisbarra.

Segundo datos oficiais da Xunta de Galicia, na nosa bisbarra existen, agárrense, 3.734 expolotacións gandeiras. Non todas teñen o mesmo número de animais, aínda que por concellos, a palma levaa Mazaricos, con 891 explotacións, seguido por Vimianzo con 804 e Zas con 667. O concello que menos número ten de explotacións é Corcubión, onde existen 14 centros de explotación gandeira.

Tamén é resaltable o dato de que no seguimento anual da Consellería, o único concello que non perdeu explotacións nos últimos anos foi Corcubión, que mantén o mesmo número desde o 95. Noutros lugares, coma Vimianzo, nos últimos cinco anos, pecharon casi cen explotacións, 98 para ser exactos, mentres en Zas, 67 foron os centros perdidos.