Información ofrecida por: WEB COSTA DA MORTE.

Debémonos dar todos cita este verán en Cee, que co seu 'Verán Cultural' ofrece aos amantes do ocio e a cultura unha ampla variedade de ofertas.

A Festa de San Cristovo abrirá o programa o día 12 de xullo con varios concertos musicais, coma os do día 14 da Banda de Música Municipal Rosalía de Castro ou o do Grupo A Roda.

Do mércores 17 de xullo ao domingo 21 de xullo celebrarase a XVIII Mostra Cultural Brens 2002, con cinema na rúa ('Harry Potter e a Pedra Filosofal' o día 17 ás 22:30'), teatro ('O tremoeiro' polo grupo Candelexas), música folk e a actuación o xoves 18 de Cándido Pazo na Casa de Cultura de Brens. Do 20 ao 27 de xullo será o turno para a I Mostra Cultural Ameixenda 2002; tamén con cinema na rúa (sábado 20 ás 22:30 Harry Potter achará a Pedra Filosofal, esta vez no Campo da Festa de Ameixenda), teatro (o 23 Pandora Teatro representará 'Noveccento') e as actuacións de música folk, do Mago Pablo na Casa da Cultura de Ameixenda (o luns 22) e do grupo rock Glut no campo da festa o mércores 24.

E seguimos na Ameixenda, pois entre o xoves 25 e o domingo 26 celébranse as Festas do Santiago Apóstolo, coa actuación estelar de Rocío Caamaño o día 25 e o I Trofeo Santiago Apóstolo de Ping-pog o sábado 27 de xullo.

Do 28 de xullo ao 12 de agosto seguirán a música folk, o teatro e o cinema na rúa, con filmes sonados coma 'Os Outros' ou 'O Señor dos Aneis'.

E chegan as Festas da Xunqueira e a súa Semana Grande entre o 12 e o 18 de agosto. Serán protagonistas cotiáns os pasarruas e charangas e as bandas de música, e en concretro a Banda de Música de O Rosal (xoves 15) e a Banda da Escola Municipal de Música de Cee (o día 16).

Terán especial protagonismo os concertos de Urbano Cabrera o luns 12 ás 21:15 na Alameda, de Berrogüeto ás 00:00 o día 14 na Praza do Concello e de Jarabe de Palo e Los Chicanos del Sur, no mesmo lugar e hora pero o venres 16 e sábado 17 respectivamente.

O peche deste animado 'Verán Cultural' darao o día 31 de agosto Susana Seivane e a II Festa do Berberecho.

Entrementres teremos outras citas de interés, como a Feira do Libro do 8 ao 11 de agosto, a XV Mostra de Teatro entre o 22 e 29 de agosto e o I Trofeo de Fútbol 'Vila de Cee'.

Máis de mes e medio de música, cine e teatro e bo xantar, e de forma ininterrumpida.

En fin; mentres non chega ese futuro predecido por Huizinga, onde as máquinas fagan o traballo duro e teñamos todo o tempo para o ocio, sempre poderemos aproveitar os eventos que a Costa da Morte ofrece para este tempo.