Comeza a volverse moi longa a lista de desperfectos provocados na Costa da Morte polo continuado temporal de vento e choiva que está a asolar a zona nos últimos sete días.

Agora tócalle a quenda á auga e tódolos records de recollida de auga na bisbarra saltaban o pasado día 5, cando en Vimianzo, e en tan so vinte minutos, eran recollidos máis de 68 litros de auga/m2. Unha inmensa tromba de auga, que entre outras cousas, provocaba importantes desperfectos nunha casa limítrofe co río Grande, á altura da Ponte Roda. Unha casa que en cuestión de minutos se viu completamente anegada, con ata un metro de auga. A esto uníase, coas primeiras luces da maña, a impresión de pobo pantasma na vila, cunha fina capa de lama sobre as estradas; a vía entre Vimianzo e Camariñas cortada por mor dunha fenda no terreo; bolsas de auga e con tódalas tapas de sumidoiros da localidade descolocadas e desbordadas.

Unha clara representación do que foi hora e media de choivas continuas, que non se limitan a Vimianzo. En Muxía, unha ampla zona de estrada entre Cee e a capital municipal está cortada de maneira intermitente por mor das fortes choivas e pola formación de bolsas de auga, que dificultan e fan perigar os vehículos que por alí circulan. A flota continua amarrada, e leva xa máis de quince días, e a predicción anuncia que a cousa continuarrá así. Para os vindeiros días espéranse novas choivas, mentres os ríos se atopan ó limite de desbordarse e o encoro da fervenza leva máis de quince días aberto e proporcionando ós curiosos o espectáculo; eso si, moi fermoso, do salto natural do río Xallas no Ézaro.