O lugar de O Pindo encáixase ao longo da estreita marxe costeira trazada pola unión de terra e océano. No pé das casas están o areal de San Pedro e un pequeno porto recollido do bravo Atlántico, igual que o de Quilmas, onde reparaban os normandos as embarcacións danadas nas súas incursións guerreiras por Galicia.

O Monte Pindo considérase o Olimpo Celta galego pola súa bretemosa lenda e xeografía. O seu relevo áspero e espido está coberto de milleiros de laxas de granito rosa, de misteriosas e fantásticas formas. En viaxe por estas terras, o Padre Sarmiento escoitou que no Pindo medraban herbas sanadoras de toda doenza, e que nas rochas do Monte se practicaban ritos de culto á fertilidade.

Se a inaccesibilidade do Monte e o seu curuto engolido por eternos neboeiros deron a crer que no alto habitaban os atemporais rexedores dos mortais destiños, a mesma condición recóndita e inhóspita, e os seus miles de rochedos labirínticos de extrañas figuras, serviron de refuxio neste século aos guerrilleiros republicanos que aqui se agocharon durante e despois da Guerra Española de 1936.

Culminando a 641 m. de altitude sobre a ría de Corcubión, a panorámica figura do Pindo domina todas as terras do Fin do Mundo. Nos días despexados, o Pindo entretense cos tonos mariños e atmosféricos, reflexando a luz en cores camaleónicas que varían do rosa ao gris.

O espacio natural do Monte Pindo encontra o seu complemento mariño na fervenza do Ezaro, un dos currunchos máis espectaculares de toda Galicia. Unico lugar en Europa, a auga do río Xallas procedente de Dumbría caía espectacularmente en fervenza nas augas atlánticas, creando un pozo de 16 m. de profundidade. O aproveitamento das augas para producción hidroeléctrica xa no permite contemplar o magno espectáculo, pero a paraxe posúe aínda unha incontestable beleza.

Para saberes máis sobre O Pindo : 
Concello de Carnota : San Gregorio, 18 / 981 85 70 32
 

Para saberes máis sobre a súa historia xa podedes mercar o libro,
          Os Celtas: os deuses esquecidos

na Librería Trazos, para calquer consulta mandenos un E-mail a: