Santa Comba, antigo dominio do Condado de Trastamara, verde terra de auga e de vida, a soidade da súa paisaxe engaiolou ao Bardo Eduardo Pondal:

Ouh, da terra de Xallas, feros corvos
que vagantes andás,
sen pensar no destino,
sen hoxe nen mañá,
quen poidera ser voso compañeiro
pola agreste soedá !

Os orballosos agros de Santa Comba alimentan ao gando do segundo centro productor de leite de Galicia e un dos máis importantes de Europa no tocante á sua calidade. A grande preponderancia da economía gandeira de Xallas maniféstase nos certames anuais adicados ao gando vacún e cabalar, feiras das máis reputadas de Galicia.

Celebrada o sábado anterior ao 1º domingo de mes e os luns seguintes ao 2º e 3º domingo do mes, a famosa Feira de Santa Comba axunta a comerciantes e compradores de Mazaricos, Zas, Coristanco, e Carballo. Esta enxebre feira é centro de negocio de gando vacún, cabalar e porcino, e máis de productos do país como o Pan de Carballo, queixos, cestos, zocos... Compre destacar tamén as grandes feiras de Santa Comba do 11 e 12 de Marzo, e do 24 de abril.

Os espallados lugares de Santa Comba encóntranse nos outeiros onde nacen ríos de augas frescas e transparentes, moi prezados pola súa troita, especialmente en Abuin, Bazar e Xallas. Landas, bouzas e silveiras acobillan tamén abondantes especies de caza menor, sendo estas terras lugar óptimo para a práctica da caza.

As 17 parroquias de Santa Comba, coa capital de mesmo nome e máis Céltigos como núcleos importantes, conservan os restos de 15 castros, a destacar o de San Bartolomeu, en Busto, parroquia de Santa Saviña ; Boaña de Riba, parroquia de Castriz ; Castro Laberco, en Labradas, parroquia de Mallón, e máis o de Turnes, na parroquia de Bazar. Merece visita igualmente o enxebre conxunto arquitectónico de Freixeiro, coa súa fonte e Igrexa do séc.XII.

Outras construccións relixiosas sacralizadoras de antigos cultos céltigos son a capela de San Bartolomeu, de panorámicas vistas do Xallas ; o santuario de Rubín, parroquia de Mallón, capela gótica do séc.XVI na que se localiza a fonte santa de San Miguel, de efeitos miragreiros para os nenos doentes, e tamén Santa María de Vilamaior, de romaría importante onde se realizan ablucións na fonte santa da igrexa.

Para saberes máis de Santa Comba :
Concello de Santa Comba : Praza do Concello, 1 / 981 88 00 75 
A MOVIDA DE SANTACOMBA