Declarada monumento histórico-artístico, a igrexa de Mens aparece citada no testamento de Urraca Fernándes, filla do Conde de Traba, no ano 1199. O templo, erexido en 1134, aínda que o seu muro norte semella máis antigo, foi mosteiro vencellado primeiramente ao San Martiño Pinario de Santiago para o ser despois á Colexiata da Coruña. 

Sobre a súa planta basilical érguense tres naves cobertas por arcos de medio ponto e bóvedas de medio cañón de destacable arquería, rematadas na testa da construcción por dous ábsides semicirculares laterais e un pentagonal central. A porta románica da fachada é un engadido posterior. Merecen asemade seren destacadas a porta do muro sur, os capiteis e os idoliños. Unha vez ao ano, a antiga igrexa monástica engalánase para acoller as Noites Musicais, famosos encontros de música culta celebrados todos os veráns neste histórico e incomparable marco. Outra festividade sobranceira no lugar é o Santiago de Mens, en xullo. 

Desde o castelo ou Torres de Mens, anterga propiedade do clan dos Moscoso de Altamira, exercían os señores o seu poder sobre o norte de Bergantiños. Destruída nas Guerras Irmandiñas de 1467 e reedificada posteriormente, a fortificación, bó exemplo da arquitectura civil galega do séc. XV, conserva a muralla defensiva e mais tres torres cadradas. Os veciños aseguran que un tunel subterráneo comunica as Torres coa igrexa, tecendo fantásticas lendas ao redor desta especulación. 

As terras dominadas polas Torres ofrecen grato lecer ao visitante que desexe disfrutar da tranquilidade de pequenas praias senlleiras e recollidas. A parroquia de Barizo conta cunha praia e cun xeitoso porto recollido dos ventos polos Picos dos Nabás. Perto encóntrase o areal do esteiro de Seiruga e o castro marítimo da ponta Galeana. Barizo, que conserva vextixios dun señorial pasado nalgunha casa brasonada e na igrexa, completa o conxunto formado por Mens e por Cores, sito na estrada Malpica - Ponte-Ceso. 

Barizo e Mens son ponto de partida para unha fermosa excursión polo monte Nariga ; Neste lugar construiuse en 1995 un orixinal faro en forma de proa de buque que, perfectamente integrado na paisaxe, inmortaliza os milleiros de cargueiros que noite e día travesan a Costa da Morte. O faro, concebido para securizar o deshabitado tramo de costa entre o Cabo Roncudo e as Illas Sisargas, fora xustamente premiado pola Unión Europea. A península ofrece tamén como curiosidade as zoantes torres do parque eólico de Nariga, o misterio de numerosas rochas modeladas en formas caprichosas, a fermosura das ínsuas do Lago, e as virxes praias de Niñóns e do Morro. 

Para saberes máis de Mens : 
Concello de Malpica : Rúa Emilio González, 1 / 981 72 03 18